Story 11

tεn cε nka be ali yom ɔy.  kɔ biyεn ti con kεrε kɔ bi fɔk.  n yArAk nyɔl ma kɔ lɔ ce.  ŋɔ nɔ pε a lε a rimila cε ɔ.  rimila cε o.  re cε o.  sɔnda cε o.  gbeli cε o.  mana taŋ ko te ɔ.  lan a caŋ eya.  ŋa gbɔnkɔ.  nya mɔ gbo ayeni.  bɔlɔ a ŋa lε a cal.  a bilε la a pantɔ.  la a hun panta.  igbel cε ŋa lεy.  ŋɔnɔ cen yema nɔ lεli kɔ tifɔlε ɔ.  sɔnda cε nya lεy.  gbel cε ŋa lε ɔ cen yema wɔ nɔkɔs domɔ wɔ yɔ.  sɔnda cε ŋa lε i cen yema wɔ lεli kɔ tifɔlε ɔ.  rimila cε nya lε.  i cen yema nɔ wɔnɔ nε domɔ wɔ.  re cε wɔ huni.  nya lε yampεrε ya de, nya lε 'kena, n bɔkulun'.  nla abεna cε nya ce ɔy, fɔm mɔn kɔ lɔ dεy.  fɔtɔ wɔn pi.  nya hin.  re cε wɔn kɔn bεkin nkwan cε.  wɔ bεki gbeli cε.  domɔ ɔy.  wɔndi dəri ŋɔ lɛŋ.  fɔtɔ ɔ hun sɔ.  gbel cε hun lεli domɔ ɔy.  nkwa lεŋ.  sɔnda cε kɔ hin.  gbel cε wɔn lεli sɔnda cε tifɔlε.  sɔnda cε nya lε a cen yema nɔ mi lεli tifɔlε ɔ.  bεt! wɔn gbunkun gbeli cε.  rimila cε kɔ nyin.  ŋɔnɔ yinε ɔy.  nla a cɔ nla a cɔ nla a cɔ hááŋ nyan kɔnε rimila cε.  rimila cε wɔ po.  wɔn kɔ ca gbel cε.  la bɔntɔ isɔy sɔnda cε gbendi bɔ igbeli cε.  sɔnda cε wɔ wu.  gbeli cε wɔ wu.  rimila cε wɔ wu.  rei cε wɔ hun fo.  nya lε ´awa.  ŋam buleŋ nya gbendi wu inaŋ.  ŋɔ na tekε mi ɔ.  lε pε ŋɔ na tekε mi inaŋ, yampεrε a bi na ŋɔnɔ nan ci ɔ.  ŋɔ mi kɔε.